మంత్రిగారి 'మాస్టర్‌ప్లాన్‌' - eenadu

హైదరాబాద్‌ విస్తరిత ప్రాంత బృహత్‌ ప్రణాళిక-2031లో మాయాజాలం
ఇష్టానుసారం జోన్ల మార్పిడి
ప్రజోపయోగ ప్రాంతాలు నివాస ప్రాంతాలుగా మార్పు
అమాత్యుడి ఒత్తిడికి తలొగ్గిన అధికారులు
మాస్టర్‌ప్లాన్‌ ముసుగులో 'రియల్‌' దందా
పర్యావరణం, సామాజిక అవసరాలకు నష్టమంటున్న నిపుణులు
ఈనాడు - హైదరాబాద్‌
సమగ్ర క్షేత్రస్థాయి అధ్యయనం లేకుండా, ఉత్తుత్తి కమిటీతో రూపొందించిన హైదరాబాద్‌ విస్తరిత ప్రాంత బృహత్‌ ప్రణాళిక-2031 గుట్టు రట్టవుతోంది. వచ్చే 20 ఏళ్లలో శివారు ప్రాంతాల ప్రణాళికాబద్ధ అభివృద్ధికి బాటలు వేయాల్సిన ప్రణాళికలో ప్రజాప్రయోజనాల కంటే.. కొంతమంది వ్యక్తిగత ప్రయోజనాలకే పెద్దపీట వేసినట్లు తెలుస్తోంది. ప్రజోపయోగ అవసరాలు, వ్యవసాయ అవసరాలకే వినియోగించాలంటూ తొలుత గుర్తించిన కొన్ని ప్రాంతాల్లోని భూముల్ని ఆ తర్వాత నివాస ప్రాంతాలుగా మార్చేశారు. తెర వెనుక జరిగిన ఈ వ్యవహారంలో ఓ మంత్రి కీలకంగా వ్యవహరించినట్లు తెలిసింది. మరోవైపు తమ ఇళ్లమీదుగా.. ప్రతిపాదించిన రహదారులను మార్చండి మహాప్రభో అంటూ.. కొన్ని గ్రామాల ప్రజలు చేసిన విజ్ఞప్తుల్ని బుట్టదాఖలు చేశారు. 5,965 చ.కిమీ ప్రాంతానికి హైదరాబాద్‌ మహానగరాభివృద్ధి సంస్థ రూపొందించిన బృహత్‌ప్రణాళిక ముసాయిదాలో నివాసప్రాంతం 763 చ.కి.మీటర్లే. వినతుల మేరకంటూ... మరో 73 చ.కిమీ అదనంగా చేర్చి 835 చ.కిమీకు పెంచేశారు. మార్పులుచేర్పుల్లో.. ప్రజలు, వివిధ సంస్థల నుంచి వచ్చిన విజ్ఞప్తుల్లో వేటిని తిరస్కరించారు.. వేటిని ఆమోదించారు.. వాటికి కారణాలేంటన్నది చిదంబర రహస్యం. ఇద్దరు,ముగ్గురి కనుసన్నల్లోనే ప్రణాళిక రూపొందించారు. గుట్టుగా సాగిన మార్పులుచేర్పులపై 'ఈనాడు' పరిశోధించగా భూవినియోగమార్పిడిలో తెర వెనుక జరిగిన వ్యవహారాలు వెలుగులోకి వచ్చాయి. * రంగారెడ్డి జిల్లా మహేశ్వరం మండలం తుమ్మలూరు పరిధిలోని 153,156,157,169,170-179,181 సర్వేనంబర్లను తొలుత జలవనరుల ప్రాంతం, బఫర్‌, పెరిఅర్బన్‌ (పరిమిత అభివృద్ధి) జోన్లుగా గుర్తించారు.
* ఈ సర్వేనంబరులో తమకున్న 42 ఎకరాల్ని నివాస ప్రాంతంగా మార్చాలంటూ ఇద్దరు వ్యక్తులు దరఖాస్తు చేశారు. అదే సమయంలో ఓ మంత్రినీ ఆశ్రయించారు. సదరు అమాత్యుడి నుంచి అధికారులకు సిఫారసులు అందాయి. అంతే.. 153, 156, 157 సర్వేనంబర్లను నివాస ప్రాంతంగా మార్చేశారు. 42 ఎకరాల్లో అత్యధిక భాగం ఈ మూడు సర్వేనంబర్లలో ఉంది.
* తుమ్మలూరుకు పక్కనే ఉన్న సిరిగిరిపురం (స.నం.77,79)లో ఆ ఇద్దరికి సుమారు నాలుగున్నర ఎకరాల భూమి ఉంది. దీన్ని తొలుత ప్రజా ఉపయోగ ప్రాంతం (సామాజిక అవసరాలు)గా గుర్తించారు.
* బృహత్‌ ప్రణాళిక ప్రకారం ఈ భూమిలో పాఠశాలలు, ప్రభుత్వ కార్యాలయాలు వంటి భవనాల నిర్మాణానికే అనుమతి. నివాస భవనాలకు అనుమతించరు.
* తమ భూమిని ఆ జోన్‌ నుంచి మార్చాలని వారు మంత్రిని ఆశ్రయించారు. అమాత్యుడి ఒత్తిళ్లతో అధికారులు సర్వేనం. 77ను నివాస ప్రాంతంగా మార్చేశారు.
* ఏకంగా ఒకటో రకం నివాస ప్రాంతం(ఆర్‌-1)గా మార్చడం గమనార్హం. ఆర్‌-1 జోన్‌లో.. ఎన్ని అంతస్తుల భవనాలైనా కట్టుకోవచ్చు.
* సర్వే నం. 79ని పెరిఅర్బన్‌ జోన్‌ (25 శాతం భూమిలో నివాస, వాణిజ్య భవనాలు కట్టుకోవచ్చు)గా మార్చారు.
* మరికొంత మందికి చెందిన భూముల విషయంలోనూ మంత్రి ఒత్తిళ్లు పనిచేసినట్లు సమాచారం. తుమ్మలూరు సర్వేనం. 247లోని ముగ్గురు వ్యక్తుల భూమిని నివాస ప్రాంతంగా మార్చాలంటూ మంత్రి అధికారులకు సిఫారసు చేశారు. ఇటీవల విడుదలైన ప్రణాళికలో ఆ సర్వేనంబరును నివాస ప్రాంతంగా గుర్తించడం గమనార్హం.
అడ్డగోలుగా భూవినియోగమార్పిడితో నివాసప్రాంతంగా మార్చడం వల్ల ఒకే చోట ఎక్కువ నిర్మాణాలతో పర్యావరణ సమస్యలు వస్తాయని నిపుణులు ఆందోళన వ్యక్తంచేస్తున్నారు. మరోవైపు ప్రజా ఉపయోగ ప్రాంతంగా గుర్తించిన ప్రాంతాల్ని నివాస ప్రాంతంగా మార్చడం వల్ల సామాజిక పరమైన అవసరాలకు ఇబ్బందులు వస్తాయంటున్నారు. ''చుట్టుపక్కల జనావాసాల దృష్టిలో పెట్టుకుని.. వారి విద్య, వైద్య, ఇతర అవసరాలకు ఉపయోగపడాల్సిన భూములను నివాస ప్రాంతంగా మారిస్తే.. భవిష్యత్తులో పాఠశాలలు, ఆసుపత్రుల వంటి భవనాల నిర్మాణానికి భూములు ఎక్కడ దొరుకుతాయి? సమీప ప్రజల సామాజిక అవసరాలు ఎలా తీరతాయి?'' అని ఓ నిపుణుడు ఆందోళన వ్యక్తం చేశారు.
ఇళ్ల మీదుగా రహదారులు
నాలుగ్గోడల మధ్య ముస్తాబు చేసిన ప్రణాళికలో.. కొన్ని చోట్ల ఉన్న రహదారులను విస్తరించకుండా వదిలేసి, వాటికి దగ్గర్లో కొత్తవి ప్రతిపాదించారు.. మరికొన్ని గ్రామాల్లో ఇళ్ల మీదుగానే భారీ రహదారుల్ని ప్రతిపాదించారు. విజయవాడ జాతీయ రహదారి నుంచి వరంగల్‌ రహదారి మధ్య ఉన్న పెద్దగూడెం, పల్లెగూడెం, ఏదులాబాద్‌ వంటి గ్రామాల్ని కలుపుతూ 100 అడుగుల రహదారులను ప్రతిపాదించారు. ఇది కార్యరూపం దాలిస్తే తమ గ్రామాల్లో పెద్ద సంఖ్యలో ఇళ్లు పోతాయంటూ అభ్యంతరాలు వ్యక్తం చేసినా.. ప్రజాప్రయోజనాన్ని పట్టించుకోకుండా యథాతధంగా తుదిప్రణాళికను విడుదల చేయడం గమనార్హం.